Diego Herrera geldi. 32 yaşındakı İspaniyalı fotojurnalist, Ukrayinadakı olayların ilk günnerindän başlayarak cenk jurnalisti olarak çalışêr, olayların gerçek tarafını gösterer.
Elbetki, kendisinä çok soruşumuz vardı, ama şindi merakımızı bir kenara braktık.
Onu datlı, nezetli imeklärlän doyurduk. Güüdesinin hem ruhunun dinnenmesi için ona bir şans verdik. Raat uyuyabilmesi için evin içindä parmakların ucunda gezdik. Diego iki gün boyunca maşınayı haydayarak Donbastan Komrata, sevildii hem her zaman beklendii evä geldi. Pek beendii kedisi dä dostunun kucaana pinmäk için saburlan beklärdi.
Göküzü cömertçä topraa bir kaar örtüsünnän sardıında, odunnar sobada çıtırdarkana, cannı ateştän yalabayan yıldız demetleri kaliplerimizi yalpak yısıdarkana, kıymetli musaafirimiz kufnidä peydalandı, derätikeni çayı yaptı, ikramnarı çıkardı da kedinin hoş mırıltısı altında bizi düşüncelär dünnesinä götürdü.
ALLAHTAN DİRLİK DİLEERİM
– Sıradan insannarın acı çekmesi pek güç.
– Dünnedä pek çok yannışlık hem keder var.
– Allahtan toprakta dirlik isteerim.
– Politika hem insannar arasındakı baa kopmuş.
– Ooluma iilik yapmaa üüredecäm. İnsannaa iilik etişmeer.
Sadä bir ses tonunnan annadardı, ama keder içindäydi. Az annadardı, ama gözleri annatmadıklarını gösterärdi. O susardı, biz dä susardık, kedi dä, soba da, ev dä, ancak kalbindeki acı dünnää işidecek kadar düülärdi. Üç ömür yaşamış gibi çok görmüş, çok çekmişti.
Diego yazılarını İspaniya yayınnarında, fotograflı haberlerini sä Türk agenstvolarına yollardı. Oradakı fotografları bizi acıtmamak için, seçeräk gösterdi. Ama gagauz küüylerinin hem insannarımızın yaşaması için fotografları bizä isteyeräk hem sırıdarak gösterdi. Herrera bir dirlik habercisidir. Sade insannarın bir sevdalısıdır.
BUCAK VATAN GİBİ OLDU
Üç yıl öncä Diego hem yavkulusu gözäl Lara Sançez Hil, Evrupa Birlii Programası çerçevesindä Gagauziyaya geldilär. Yerli insannarın yaşamasını hem ilişkileri taa ii annamak için altı ay bir Gagauz ailesindä yaşadılar. Gençlär Rus dilini üürendilär, pek çok ilginç materiyal topladılar, engelli insanlarlan buluştular, o uşakların eni becerilär geliştirmelerinä yardımcı oldular.
Burada işleri bitinca Ermenistana gittilär. Ama hep tek başlarına ya da çift olarak bizä Komrata gelerlär. Bucak onnarın evi gibi oldu. Artık kimsey onnarı burada yabancı saymêêr.
HAYDAR GEZİSİ
Güzün birliktä Haydara (Diegonun en sevdii gagauz küüyü) gittik. Laraylan sokakta küüydä sokakta gezärkänä herkez selämleşêêr, gülümseer da “Diego neredä?” sorêr:
Bir tükäna gireriz – orada da selämnamaylan birliktä soruşlar yaayer:
“Neçin Diego yok?” Baaşışlarımızı hesaba almayan çoban ayleleri şaşêr: “Diegosuz mu geldiniz?”
E, “İspaniyalı Gagauz” (biz ona bölä deeriz) o gün neredäydi?
Dur-otur bilmeyän Herrera da Haydardaydı, ama gün batarkan koyunnarın saalmasını çekmää deyni tırlaya (“Çoban ofisi”) kaçtı.
ÇEKİM
Diegonun dış görünüşü suukkanlıdır, ancak içindä üç energiya stanţiyası vardır. Her şeyi becerer: zannatında da, evdä dä! Komratın hem Çadırın küülerinin baştan başa gezdi. Korona virusu Valkaneşi görmää engel etti. Binnerlän fotograf çıkardı. Kiminnän karşılaşarsa, öla aklında kalêr o annar.
Gagauzlar bu balaban, sakallı, soţial, sevgi dolu, fotoaparatı olan “kendi adamına” pek beendilär. O geldincä ortalık yortu gibi olêr.
Diego gözäl kaliplär için bir çekim merkezidir.
O BASKLARDANDIR.
Bask devletindä, İspaniyanın poyrazında, Bilbao kasabasında duudu dostumuz. Gagauzlar bölä bir erin olduunu bilmeyceydilär dä, ama şindi büük hodulluklan annadêrlar o topraklarda duumuş onnarın bu dostu için.
Pek çok engelli insan Diegoyu hem yavkulusunu pek bekleerlär uurasınnar onnara.
Nezaman bitki kerä bir sepet bomboli, meyva, baaşış alıp engelli bir insana uuradınız, onunnan saatlarlan dünneyi annattınız, ona sarmaştınız hem umut verdiniz? Sanêrım, ani bizdä baari bir engelli insan tanıyan pek az kişi var. Bu gözäl İspaniyalı çift onnarı tanımaktan kaarä, onnarı koruyer, onnarı üüreder da ömür boyunca onnara yolculuk eder… İnsana insana lääzım!
ANATARI BULDU
Ama neçin onnar bizä, küçük Gagauziyaya geldilär? Bütün dünnää onnara açıktı. Biz kartada küçücük bir noktayız, tamamına açılmamış bir halkız, fakir bir bölgäyiz.
– Sän ne…? Gagauzlar zengin bir halktır! – üüsek seslän cuvap verer Diego. – Ruhu, kulturası, adetleri, misafircilii….
– Göktä taa sona kadar açılmayan sırlı bir yıldız gibisiniz. Bu işin derinniinä inmää isteerim.
– Benim devletimdä adetlerä pek saygı gösterilmäz, ama sizdä adetlar ayorzlu bir iş gibidir.
– İlkin Gagauzlar bana lafetmeyan, dürük, seryoz insannar gibi göründü. Ama kalplerinin anatarını buldum her şey diişti. Bu anatar sadelik, simpatiya hem ilgiydi. Gagauzlar bendä bunu gördüp kaliplerini açıldılar.
Sözlücäk
Dur-otur bilmeyän неугомонный
Sır тайна
Yazdı Anna Harlamenko
Çevirdi Güllü Karanfil
Devamı Yanvarın 1-dä…
