Anna Harlamenko, Gagauz kulturasının legendalarını anarak, okuyuculara Semön Vasiliyeviç Pometkonun ihlam verici ömür yolu için kendi bakışını teklif eder. Universitettä başlayan dostluunu hem yaradıcı ortaklıını annadan bu yazı, büük muzıkacının yaşamasının şaştırıcı momentlerini gösterer. Okuyucu, Gagauz melodiyasının atmosferasına dalêr, ancak kemençä hem piyanino seslerini diil, hem da gülümsemälerinin sıcaklıını da duyer. Bu, salt «Düz Ava» ansamblisinin kurucusu Sêmın (dostları ona Sêm däärdilär) bir legendası diil, hem dä sekizinci notanın – Sevgi notasının – cannanmış hala gelmesi için bir yazıdır.
Okumadıyasanız bu annatmayı baştan, bu LİNKE basıp okuyabilirsiniz (başka sayfa açılacek)
GAGAUZİYAYI DÜNNÄÄ “DÜZ AVA”ylan TANIDI
“Düz Ava” Gagauz Türkü hem Dans Ansamblisi 1971-ci yılda kuruldu da yavaş-yavaş Gagauzların vizit kartı oldu, halkımızı dünneyä açtı, kulturamızı üüsek uura çıkardı.
2022-inci yılda, “Düz Ava” ansamblisi Gagauz adetlerini koruma hem yaşatma çalışmaları için, Moldova Respublikasının Şannı ansamblisi adını kazandı.
“Düz Ava”nın türküleri hem dansları, konţertleri, festivalleri, gastrolileri hep sevildi hem seviler. Ansambli, Gagauz halkının en talantlı muzıka ustalarını bireri topladı.
“Düz Ava”nın istoriyası, derin, unikal bir kişinin, Gagauz folklorunun büük bir uzmanı, sarsılmaz bir liderin Semön Pometkonun adınnan baalıdır.
SEVGİ OLMADAN, MUZIKA DA DATSIZDIR
– Ruhumda çok nota var, ama muzıkada salt yedi nota var. Bu notalarlan her melodiyayı çalabilirim, ama iisik olan bir nota taa var” – deyärdi Sêm.
Ad için, ödül için, şan için kaçmadı, çok yavaştı, sessizdi ansamblisinä büük baalılıklan izmet etti, ancak sekizinci notasını aarardı – Sevgi notasını.
“Sevgi yoksa, dünnedeki yaşamak hem her türlü melodiyalar da datsızdır!” – deyärdi Sêm, da bu datsızlaa gözällik, lirizma, käämillik katardı.
Patret Semön Pometko kakusunun Praskovya Kunçeva’nın (Pometko) arhivindän
Populär bir kompozitor-türkücü (kimi kerä türkü yazardı, ama kendisi için) yada bir muzıkant-virtuoz olabilirdi, ama o halk muzıkasının oranjirovkacısı, Gagauz muzıkasının sesi oldu.
Karannıkta bir mum gibi yandı da ölenä kadar sesledi yaşamasını, ondan, kendisindän, gördüü her şeydän – halkın ruhuna olan gerçek sevgimizi çıkarmak için.
Patret Semön Pometko kakusunun Praskovya Kunçeva’nın (Pometko) arhivindän
Çıkardı da. Kendinisä yakıp kül etti. Ateşli ürää hem ihlamınnan bir Sevgi notası yarattı., Bilerim, ani öbür dünnedä dä hep arêêr hem yaradêr.
ADET GİBİ OLDU
Düz Ava, 2000-ci yıldan başlayarak her yıl fevralın 7-dä Maestronun duuma günündä kurucusuna bir yaradıcılık-raportu olarak her yıl konţert geçirer. Sçenada, sert bir bakışlan “sevgi notası” konţertinin nasıl geçtiini siireder.
Birkaç minut içindä zal siiredicilärlän dolar, onnar sadecä Gagauz muzıkasını seslemää deyni diil, hem dä yerli, en sevilän muzıkamızdan gurur payını almak için gelirlär.
Sevgi düşüncelerinnän duan Semön Pometko, sevgiyi canımıza yerleştirdi.
Gagauz, neredä olursa olsun, halkının melodiyasını işidän gibi kalbi duuduu topraklara yollanêr.
Orada gündöndü güneşä, üzüm salkımnarı rubin küpelerä, kuzunun gözleri uşaan gözyaşlarına benzeer.
Vatanın bu resimcikleri ruha ihlam verer, ruh yaşamanın üstündä uçmak için kanatlanêr.
Bak, SEVGİ budur, Semön Vasilyeviç. SEKİZİNCİ NOTAN!
Patret Semön Pometko kakusunun Praskovya Kunçeva’nın (Pometko) arhivindän
Yazdı Anna Harlamenko
Çevirdi Güllü Karanfil
