Kıran ayın 23-dä Gagauz Avtonomiyanın 28-ci dönümündä Kıpçak küüdä oldu bir büük istoriya hem etnografiya muzeyin açılışı. Açılışa katıldı küün yaşayannarı, türlü musaafırlär hem küün öndürüceleri.
“Bu pek önemni bir iş diil sade Kıpçaa deyni, ama bütün Gagauziyaya deyni dä. Peydalandı taa bir er, neredä yaşayacek hem yaşadılacek bizim, gagauzların istoriyası, kulturası, adetleri. Herbir halkın gelecää baalı ona, biler mi o hem ne taa da pek paalı, isteer mi o bilmää kendi halkın istoriyasını, dilini, adetlerini. Annȇȇr mı bu işlerin kıymetini, becerer mi onnarı korumaa, savaşȇr mı etiştirmää onnarı kendi uşaklarına, terbieder mi onnarda sevgi bu işlerä. Kıpçaan eni açılan muzeyi mutlak bu daavaları tamannamaa yardımcı olacek!”, – söledı Avdarma muzeyin öndürücüsü Elena Karamit.
Başka musaafirlär dä bölä bir muzey açılmasını önemli saydılar da ekledilär, ki bu gagauz kulturanın ilerletmak için, onun tanıtılmasına deyni büük bir adım oldu.
