Gagauziyanın anılmış jurnalistı, publiţist Anna Harlamenko yazdı büük hem pek meraklı material gagauz grafikacısı Petri Vlah için. Bu materialı biz paylara bölüp saytımıza erleştireriz. Aşaada annatmanın sıradakı payı.
Annatmayı baştan okumak için linkli bölümnerä tıklayınız: ÇEKETMESİ, 2 BÖLÜM, 3 BÖLÜM, 4 BÖLÜM.
GRAFİKA
Kiyat damgaları resimcinin bir başka sevdasıydı. Ona danışannarın zanaat hem hobilerini gösterän küçük ştamplar, başka türlü desäk, kişisel ekslibrislär yarattı. Grafikalarına folklor elementleri, halk suretlerini, Gagauz simvollarını ekledi.
Vlah, Bucak halk motivlerini yakından aaraştırdı da onnarda milli grafikanın dilini zenginneştirän yeni kaynaklar buldu. Miniatüralarının çoyu, käämil bir şekildä üürendii linogravüra tehnikasınnan yapılmıştır. Onnar originallıınnan, kompoziţiyasınnan hem tehnika ustalıınnan büüleer.
Pötr Nikolaeviç tantela üstündä halk ornamentleri hem kenarlarında iki horoz görüntüsünnän ilk ekslibrisini kendi bibliotekası için yaptı. Yaklaşık 100 şedevra dostları hem senseleleri için yarattı.
Grafikası halklararası hem respublika sergilerindä gösterildi. Vlahın bu uurda sergilenmesi katılmcılar için bir sürpriz oldu, az kişi onun tehnikada güçlü, original hem becerikli bir gravüracı olduunu düşünärdi.
Petri Vlah grafikada çok önnüdür: Gagauz bilim adamnarının, yazıcıların, kompozitorların kitaplarının dizaynını hazırladı, plastinkaların resim dizaynını hazırladı, milli simvollar çıkarttı; industriya alanı için ürün etiketleri, logotiplär, emblemalar, etiketlär yarattı.
İlk kerä Oktäbrinin 29-unda 1989da Komrattakı bir mitingdä dalgalandırılan canavar başlı hem kenarları horozçuklu ilk Gagauz bayraan avtorlarından biridir.
Müzeydä Petri Vlahın taa bir şaştıran eksponatı var– koraflı bir sofra skemeciklerinnän, şüpesiz bu şedevra Vlahın yaratmasıdır.
USTANIN İŞİ YAŞÊÊR
“Gagauziya Halk Ustaları” dernää hem Komrat Zanaat Evi, Vlahın susak yetiştirmä hem yakma “estafetasını” elä aldı. Genç ustalar Olga Koltuklu, Pyotr Novakov, Aleksandr Keleş, Gagauzların hem Bulgarların yaşamından momentleri kendi tehniklasınnan susaklarda göstererlär. Petri Kapaklı master klas ta verer.
Resimci Vladimir Topal, Vlahın susaklarını tablolarında ölümsüzleştirdi da Torontoda Ustanın adına bir sergi düzennedi.
Petr Vlahın yaratmaları yaşêêr, dekorativ hem uygulamalı incä zanaat onun yaradıcılıını beenänneri hep taa sevindirer. Yaratmaların Gagauziyanın görsel kulturasında büük hem önemni bir yeri var.
Petri Vlahın dünneyä getirdii hem soluk verdii eşsiz susak donatma dizaynı ona ölümsüzlük kazandırmıştır.
Sözlücäk:
Yetiştirmä – выращивать
Çok önnü – многоганный, многосторонний
Materialın sonu çıkacek Yanvarın 23-dä…
Yazdı Anna Harlamenko
Çevirdi Güllü Karanfil
Baş foto ceadir-lunga.md saytından alındı
