Parlament seçimnerinӓ karşı, güzün, bir büük kavga oldu. Komrattakı Devlet konţelӓriyanın başı Sergey Çernev programaların birisindӓ primarların bir listesini sıraladı,angıları, sanki Şordan her ay binӓr evro kabledӓrmişlӓr.
Hep bu zamannar internetta primarların hem aktivistlerin listesinnӓn dokumentlӓr peydalandı, angılar, sanki, Şorun kuruluşundan ofiţial olmayarak ödek kabledӓrmişlӓr. Listedӓ sekiz gagauz primarların adları da belli oldu, angıları, dökumentlerӓ görӓ, 1000 evro üstünӓ kabledӓrmişlӓr. Bu listedeki primarlar için ne belli, hem ne türlü bu oluşu açıklêêrlar – TUKun yazısında.
«Evrasiyaylan» baalantı hem Guţulun koruması
2023-üncü yılda Sergey Tukan Baurçu küüyün primarı oldu. Onun kandidaturasını ozaman ‘Diriliş’ partiyası destekledi. Seçimnӓr için reklam videosunda annadardılar, ani o Rusiyada taa çok işlemiş.
Tukan taa kapanda oturan Evgeniya Guţula destek mitingindӓ pay almış. Mitingtӓ o annadarmış, nicӓ Guţula destek olmak için imzalar toplanarmış, hem diplomat misiyasına danışarmışlar.
‘Büün o kapalı, kapanda oturêr. Ama bizim devlet kuvetleri unuttular, ani o karı. İlk sıradan, o iki uşaan bir anası’,- dedi mitingtӓ Tukan.
Tukanın primarlık vakıdında Baurçuda ‘Evrasiya’ kurumun yardımınnan proekt üzӓ çıktı. İnformaţiya hem güvennik Hizmetlerin teklifinnӓn Moldovada ‘Evrasiyayı’ devledin iç işlerinӓ karışması için ekstrimist olarak kabledilsin istemişlӓr. Moldovadakı İGHnın bilgilerinӓ görӓ, ‘Evrasiya’ ‘Pobeda’politik proektinnӓn baalı.
Aprelin 2024-ündӓ Moskovada İlan Şorun başkannıın altında ‘Pobeda’ politik blokun kurulması açıklandı.Parlament deputadın Aleksandr Suhodolskinin yayınlandıı patredindӓ Sergey Tukan da var (soldan kenarkı).
— ‘Patrettӓ çok işlӓr var nicӓ olsun. Sizӓ lӓӓzımsa, bunu var kim aaraştırsın, bӓn çoktanca taa ilerdӓn orada bulunardım. Kendi işlerim için.
— Ama siz ‘Pobeda’ blokun tanıtımında vardınız mı?
— Yok, birerdӓ bӓn yoktum, saalıcaklan’
Para alması için kabaatlamaklarlan Tukan kayıl diil.
‘Ani kabaatlêêrlar….kanatlayın. Soruşum yok, eer siz neredӓsӓ nesӓ gördüysediniz, ani bӓn nesӓ aldım, yada bana bank kartıma nesӓ geldi. Burada lafım yok’.
GagauzLêndın beterinӓ Kongaz primara daavalar
Taa bir primar, angısı Moskovadakı ‘Pobeda blokun’ kuruluş toplantısında pay aldı – Kongaz küüyün başı – Mihail Esir.
Esir bitki primar seçimnerindӓ kazandı ‘Diriliş’ partiyasın azası olarak. Taa da Kongaz primariyası İlan Şorun proektinӓ izin verdi, taa doorudan GagauzLênd atraksion parkın yapımasına.
Esirӓ deyni bu daavaya döndü. Devlet tehnik kontrol polisi düşüner, ani Kongazın primarı atraksion parkın proekti için kasabacılık sertifikadını yalannan imzaladı.
Daavadan bir kısmın
Bakannıın bakışına görӓ, sertifikatının çıkışında şafk firmasından, Devlet maşina yollar bakannıından, Çevre koruma inspekţiyasından sonuçlar alınmamış. Esirӓ 12,5 bin leylik ştraf yazdılar. Sonucu dartıştırdı. Birinci instansiya mahkemesi Devlet tehnik kontrol polisin ştrafını vazgeçtirdi.
Evgeniya Guţulun destek mitingindӓ Kongaz primarı da peydalandı.
‘Gagauz halkı kendinӓ başkan seçti, ondan da gagauz halkı cezayı kesecek. Serbestlik Evgeniya Guţula’, — avgustun üçündӓ 2025-inci yılda Gagauz Erin başın Komrattakı destek mitingindӓ Esir söledi.
Tuka verilӓn komentariyasında Esir cebӓ para alması için bişey demӓӓ istӓmedi da bir kısa cuvaptan sora telefonu kapattı.
‘Türlü boş laflara kamentariya vermeerim, haberiniz olsun’,- cuvap etti Esir.
EB’dan proektlӓr için hem Rusiyadan proektlӓr için Beşalmada
Valeriy Moş – Komrat rayonun Beşalma küüyün başı. Moskovadakı ‘Pobeda’ blokun açılması için toplantısının pay alannarın birisiydi. Ama buna bakmayarak, Valeriy Moş Evpropa Birliin proektlerini destekleer.
’15 yılın içindӓ biz EB hem Evropa devletlerin yardımınnan onnarca proekt üzӓ çıkardık. Nicӓ bӓn var nicӓ karşı çakayım te ona, ani insannar geldilӓr dӓ bizӓ yardımcı oldular. Bӓn bilmeerim, kim ne söleer, kim neyӓ karşı, ama bizӓ Evropa da, Rusiya da yardımcı oldular. Ondan biz hepsinnӓn işleeriz’, — Beşalma primarı notaladı.
Ani Moş Şorlan baalı, taa 2023-tӓ belli oldu. Moldovanın bilgi hem korumak izmeti Moldovanın seçimnerin dışardan etkilenmesinin raporunu tiparladı. BKH notaladı, ani seçimnerӓ karşı lӓӓzımnı kandidatların desteklenmesi için infrastruktura proektleri finans edildi. Bölӓ annaşmakları imzalayan primarların arasında Valeriy Moş ta belli oldu.
‘Büün herbir insanı var nicӓ bılamaa bir laflan. Laftan kaarӓ, bӓn kanat ta görmӓӓ isteerim. Bӓn eminim, ki eer kanat olsaydı, onnarı çoktan üzӓ çıkarırdılar. Onuştan, bӓn dӓ büün var nicӓ çok işlӓr söleyim – kim ne yapêr. Ama eer kanat yoksa, ozaman bu sade laf’, — cebӓ para alması için Beşalma primarı dedi.
O taa ekledi, ani hak koruma izmetlerindӓn bu sebeptӓn kimsey danışmadı.
Soruşa kim İlkyazın 2024’ündӓ ‘Pobeda’ blokun toplantısına yolu ödedi, Moş cuvap etti, ani tutmêêr aklısında.
Listedӓn başka primarlar için ne belli?
Her ay Şordan para kabledӓn listedeki primarların arasında Ruskaya Kiseliyanın primarı Georgiy Gospodinov da belli oldu.
Onun adı taa BKH’nın raporunda notalandı, angısında 2023’üncü yılın seçimnerindӓ ilişikliini gösterildi. Bakannıkta notaladılar, ani Gospodinov 500 bin leylik yol düzmesi için bir annaşma imzalamış.
2023-üncü yılın seçimnerindӓ o ‘Şans’ partiyasından kandidaturasını verdi. Ama Moldovanın Acil olaylarda devlet komisiyanın kararına görӓ, bu partiyanın kandidatları seçimnerdӓn çıkarıldı. Ruskaya Kiseliyada Gospodinov sade bir kandidattı. Bu sebeptӓn eni seçimnӓr lӓӓzım oldu yapmaa, ama ilkyazın 2024’üncüdӓ. Bu sıra o bir baamsız kandidat olarak seçimnerӓ katıldı.
2016-ncı yılda Rise Moldova mediyanın gazetacıları ortaya çıkardılar, ani Gospodinovun evindӓ Başkanın ilk yardımcısı İlya Uzun yazılıymış, angısı o vakıtlar Halk Topluşun seçimnerindӓ pay almıştı.
Şordan para kabletmenin bilgisini Gospodinov açıklamaa istӓmedi.
‘Bu düpedüz yalan da bӓn ona cuvap etmӓӓ istӓmeerim. Seşimnӓr bitti, da bӓn bu işlӓn gülüntü olmayacam’,- cuvap etti Gospodinov.
Taa bir müdür, sanki Şorlan baalı olannarın listesindӓn – Kotovski küüyün başı Georgiy Palik. İki yıl geeri o ‘Şans’ partiyasından erli seçimnerӓ katıldı.
O seçimnerdӓ o kazanamadı. Moldovanın öndercilerin kararına görӓ, ‘Şans’ partiyanın kandidatlarını seçimnerdӓn çıkardılar. Kuvetlerin bilgilerinӓ görӓ, Rusiya İlan Şorun liderliin altında suç grubunu finans etmiş, shemanın da bir payı – ‘Şans’ partiyasıydı. Palik yalnız bir kandidattı, ondan da seçimnӓr geçmedi. Mayın 2024-ündӓ seçimnӓr tekrar geçti, neredӓ o serbest kandidat olarak pay aldı, genӓ da kankurentsiz.
2024-ündӓ Kotovski küüyün hepsi dokuz kandidatı MAN Partiyasından çıktılar da ‘Diriliş’ partiyasına katıldılar. Ozaman bu kararı küüyün başı Georgiy Palik tӓ kanatladı. Onnar ilkyazın 2024-ündӓ seçildi. ‘Diriliş’ tӓ İlan Şorlan baalı. Te ölӓ, apreldӓ 2024-tӓ bu partiya ‘Pobeda’ partiya blokuna katıldı, neredӓ başkan Şordu.
Şordan her ay cebӓ alan para primarların listesindӓ onun adın peydalanmasını yalanladı.
‘Bӓn şindi yok nicӓ nesoysa komentariya vereyim. Nedӓn bölӓ oldu, bӓn bilmeerim, kimseylӓn dӓ bӓn bişey istӓmeerim… doorudan bӓn bilmeerim’,- dedi Palik.
Onun laflarına görӓ, Şorun grubunnan onu bişey baalamêêr.
‘Beki, ani bӓn iki yıl geeri Şans partiyasından katıldım, beki oradan bişey kaldı, ama bӓn çekildim onnardan. Sora serbest olarak katıldım da hiç birisinnӓn bir dӓ baalantım yok, kimseyӓ dӓ bӓn borçlu diilim’.
Kazayak küüyün primarı Grigoriy Kör dӓ bu sekiz primarın listesindӓ bulundu. Geçӓn seçimnerdӓ o ‘Diriliş’ partiyasından katıldı.
‘Bu konu halizindӓn lӓӓzım çözülsün. Biz primarlar kurumunnan bunu isteeriz. (…) Siz o listeleri bakınız. Orada var mister X, mister Y. Petr var nicӓ olsun bu X kendiniz da mi sayılêrsınız? Neredӓ kanat var? Bӓn kendim bunu Çerneva söledim’,- TUKa deyni dedi Kör.
